SISINDIRAN

Rarakitan

Lamun hayang bala-bala

Kudu daék nyieunana

Lamun hayang hirup bagja

Kudu daék usahana

 

Lamun hayang buah jambu

Kudu ngala na tangkalna

Lamun hayang réa élmu

Kudu daék diajarna

Lamun hayang ka jakarta

Ulah poho kana mandi

Lamun hayang dipercaya

Ulah poho kana jangji

 

Lamun eukeur ngala entéh

Ulah bari ngala bonténg

Lamun urang leutik kénéh 

Ulah loba ngomong goréng

Ka mana jalan ka pasar 

Ka ditu ka belah wétan

Ka mana mun hayang dahar

Ka ditu ka tukang ketan

Kuring mah alim ka Bogor

Hayang ka cikonéng baé

Kuring mah lain ngabodor

Hayang ka si enéng baé

Aya lampu na tanjakan

Dihalangan lampu cina

Aya istri geulis pisan

Dihalangan salakina 

Kuring mah alim sakola

Hayang geura ulin baé

Kuring mah alim ka randa

Hayang nu can kawin baé 

Ka mana jalan ka palu

Ka ditu ka belah wétan

Ka mana néangan élmu

Ka ditu ka sakolaan

Lamun hayang bisa gitar

Kudu getol diajarna

Lamun hayang jadi beunghar

Kudu getol digawéna

Paparikan

Aya oray dina tangkal

Katingali liwat kaca

Lamun hayang réa akal

Kudu getol kana maca

 

Ka talaga bari ulin

Barang bawa pas balikna

Lamun ibadahna rajin

Bakal babari hirupna

Ka mana jalan ka Bogor

Ka ditu ka leuweung kolot

Hirup ulah loba bodor

Paéh teu nungguan kolot

Meuncit hayam maké péso

Nu sok hiber manuk gagak

Lain kuring henteu rédo

Tapi matak jadi cagak

Hujan gedé matak tiris

Jelema mani balaga

Barang téh kacida awis

Padahal mah teu sapira

Lain hiji lain dua

Émutna baé ka salira

Lainna hayang midua

Geulisna kabina-bina

Baju hideung dikancingan

Baju bodas nu si Dali

Manéhna keur duduaan

Ngan hanjakal jeung lalaki

Ka ditu ka pamancingan

Jeujeur useup tina awi

Ulah daék duduaan

Lamun lain jeung salaki

Nongton pélem Upin Ipin

Si Mail naék sapédah

Lamun embung jadi miskin

Ulah eureunan ibadah

Cau ambon cau raja

Manuk leutik di buruan

Lamun hayang hirup bagja

Sing bisa silih tulungan  

Wawangsalan 

Pentilna tangkal kai

Asmara nu matak liwung 

Iwung 

Pakakas paranti ngarit

Tinggal dina kamelang 

Parang

Sok dipake nyetel lagu 

Sora nyawa kari sakesetan 

Kasét

Sato nu leumpangna nyangigir

Ngeuteuyeup na lelembutan 

Keuyeup

Paranti mirun seuneu

Kulawu na rasa nu teu kungsi kebat 

Hawu

Bahan jang nutupan pingping 

Ceu oyah ngagoreng emping 

Samping

Kembang beureum cucukan 

Lamun meuli kudu nawar 

Mawar

Alat keur komunikasi

Kuring mah beuki kelepon

Telepon

Alat paranti solat

Kudu getol ka ibadah

Sajadah 

Hejo leutik sok aya di sawah

Émut baé ka salira

Simeut